Амадузына jеткен!

Кару кычыраачыларыс, бу номердеҥ ала бис слерди «Jылдыстыктыҥ» мынаҥ озо номерлеринде чыккан геройлорысла база катап таныштырарыс.
Бӱгӱн бис 2005 jылдыҥ кичӱ изӱ айыныҥ 4-чи кӱнинде чыккан «Jылдыстыктыҥ» номерин тудунып, Горно-Алтайсктагы поликлиника jаар ууландыс. Не дезе, ол номердиҥ баштапкы бӱгинде республикан гимназияныҥ 11-чи клазыныҥ ӱренчиги, ара сӧӧктӱ Мендешева Аста керегинде jетирӱ болгон. Ол ӧйдӧ Аста школдыҥ ӱренчиктериниҥ бойы башкарынар «Эрjине» республиказында су-кадык аайынча министрдиҥ ижин бӱдӱрген, оогоштоҥ бери врачтыҥ профессиязын аларга амадаган. Оныҥ тайнагы Анна Итоковна Ачимова Балыкчыда jажына медсестра болуп иштеген, канча баланыҥ кин энези болгон.
Гимназияны jедимдӱ божодып, Аста Барнаулдагы Алтайский медициналык университетке ӱредӱге кирген. Ондо терапевттиҥ ӱредӱзин алган. Интернатуразын республикан эмчиликтиҥ «Терапия» бӧлӱгинде ӧдӱп, ижиле jууктада танышкан. Врач болуп таҥынаҥ иштеер тап-эригин алган соҥында Оҥдой jуртта, аймактыҥ Каракол jуртыныҥ амбулаториязында иштеген, былтырдаҥ бери Горно-Алтайсктагы поликлиникада терапевт болуп иштейт.
Аста Александровна 5-чи таҥмалу участокто jадып турган улустыҥ су-кадыгын шиҥдеп jат. Ого каланыҥ Кучияк микрорайоныныҥ оромдоры кирет. Терапевт оорып jобогон улусты эмдеп, ого ӱзеери чыккан jылы аайынча диспансеризация ӧдӧтӧндӧрди су-кадыгын шиҥдезин деп кычырат, аjаруда тудат.
Эмчи айыл-jуртту, Оҥдой аймактыҥ Кулады jуртыныҥ Матовтордыҥ калыҥ jуртына барып, уулчак азырайт.
Аста Александровна газеттиҥ кычыраачыларына jаан эзен айдып, су-кадыгын чеберлеп jӱрзин деп кӱӱнзейт.

cholmony0022

А. ТОХТОНОВА

Related posts

комментарии