Пятница, 29 марта 2024   Подписка на обновления  RSS  Письмо редактору
Амыр-энчӱниҥ элчизи—кожоҥчы, кайчы
10:26, 29 ноября 2014

Амыр-энчӱниҥ элчизи—кожоҥчы, кайчы


bairyshev

Ӱлӱрген айдыҥ 27-чи кӱнинеҥ ала кӱчӱрген айдыҥ 1-кы кӱнине jетире Россия Федерацияныҥ нерелӱ артизи Болот Байрышев ле «А—Я» («Алтай—Япония») деген jарлу ӧмӧлик ады-чуузы телекейде jарлу Джон Зорн деп кӱӱчиниҥ Нью-Йоркто студия-клубында эки ойын-концертин кӧргӱсти.
Болот Байрышев, «А—Я» ӧмӧлик, Тандалай Модорова jаҥы кӱӱлик альбомын бичигендер. Оныҥ продюсери Джон Зорн. Jаҥы jылга jетпей кӱӱлик альбом ак-jарыкка чыгар.

***

Кӱчӱрген айдыҥ 5-12 кӱндеринде Болот Байрышев кӧчӱп jӱрер «Манящие миры этнической России» деген ээчий 11-чи фестивальда турушты. Ол Улу Jеҥӱниҥ 70 jылдыгына учурлалган ӱлекер. Белоруссияныҥ ла Россияныҥ герой-калаларыла «Пространство памяти» деп jаан ойын-концерт ӧткӧн. Фестивальдыҥ туружаачылары Мозаль, Гомель, Светлогорск, Дробыши (Белоруссия), Брянск ла Смоленск (Россия) калаларла jорыктаган. Алты каланыҥ эл-jоны солун байрам кӧргӧн, ондо турушкан. Jол келижип, Бресттеги шибеени база табарган. «Кинодо кӧрӧлӧ, чын бойын кӧрӧргӧ база jилбилӱ, солун»—деп, Болот айтты.

***

Кӱчӱрген айдыҥ 22-чи кӱнинде Болоттыҥ таҥынаҥ концерти Новоалтайсктыҥ «Космос» деген jаан клубында ӧткӧн.

***

Кӱчӱрген айдыҥ 27-чи кӱнинде Барнаулда «ТАСС» деген клубта (мында кажы ла jарым jылдыҥ бажында Болот Байрышевтиҥ концерти ӧдӧт) Болот, «Belukha Jan», Алексей Чичаков (Кӧксуу-Оозынаҥ) ойын-концертин кӧргӱзер.

***

Окылу кычыртула кӱчӱрген айдыҥ 30-чы ла jаҥар айдыҥ 1-кы кӱнинде Болот Байрышев Ак Тӧбӧдӧ (Актюбинскте) jаан учурлу концертте туружар.

***

Jаҥар айдыҥ 10-15 кӱндеринде Дудинка-Норильскте (Таймыр) калыктар ортодогы «Притяжение Таймыра» деп 2-чи фестиваль ӧдӧр. Jайалталу jерлежис ондо база туружар.
Келер jылда Болоттыҥ jайаан jол-jорыктары база да кӧп. Темдектезе, Хабаровскты, Камчатканы эбирип, jайалтазыла таныштырар. «Алтайдыҥ Чолмоны» газеттиҥ кычыраачыларыныҥ адынаҥ телекейле jорыктап, калыктар ортодо наjылык, амыр-энчӱ, ӧзӱмдӱ jадын-jӱрӱм учун иштеп jӱрген jерлежиске, оморкодубыска ачык, jеҥил jол, jаҥы jедимдер кӱӱнзейли.

К. Пиянтинова

Об авторе: Звезда Алтая


Добавить комментарий

© 2024 Звезда Алтая
Дизайн и поддержка: GoodwinPress.ru