Байрам бийик кеминде ӧтти

Алтай Республиканыҥ jурт ээлеминиҥ ле перерабатывающий промышленнозыныҥ ишчилериниҥ профессионал байрамына учурлалган jуун кӱчӱрген айдыҥ 18-чи кӱнинде Горно-Алтайскта драмтеатрдыҥ jаан залында ӧтти.
Байрамга учурлалган jуунныҥ баштапкы бӧлӱгинде 2014 jылда ӧткӧн ишмекчи мӧрӧйдиҥ jеҥӱчилдерин АР-диҥ jурт ээлем аайынча министри Ю. С. Земиров кайралдады. Jуунныҥ экинчи бӧлӱги АР-диҥ Башкарузыныҥ Председателиниҥ ордынчызы А. А. Сакладов таланыҥ jааныныҥ адынаҥ айткан уткуулла улалган. «Ороонныҥ ла таланыҥ башкартулары jурт ээлемниҥ ишчилериниҥ jадын-jӱрӱмин jарандырары jанынаҥ кӧпти эдет. Jаҥыс ла производительдерге jӧмӧлтӧ эдилип турган эмес, jе анайда ок jурттарда балдардыҥ садтары, школдор, эмчиликтер, кӱрлер, jолдор ло о. ӧ. тудулат. Быjыл слердиҥ ижигерге ар-бӱткенниҥ качалаҥы jаан буудагын jетирди. Jе ороонныҥ Президенти ле Башкарузы слерди jӧмӧлтӧ jогынаҥ артырбады, ар-бӱткенниҥ салтарларын jоголторына акча чыгарылат. А. В. Бердников кӧп jурттарда болуп, jербойында айалганы кӧргӧн, курч сурактарды билер. Республикан башкару мынаҥ да ары jурт jердиҥ улузына jӧмӧлтӧ эдерин элбеде ӧткӱрер»—деп, Александр Анатольевич уткуулду сӧс айдар тушта темдектеген.
Анайда ок уткуулду сӧстӧрин АР-диҥ Эл Курултайыныҥ Председатели И. И. Белеков, jурт ээлемле колбулу иштеп турган банктардыҥ чыгартулу улузы айткан.
Туулу Алтайдыҥ АПК-зыныҥ бу байрамдык jуунда Россия ла республика кеминде государственный кайралдарла кайралдаткан озочыл иштӱлери керегинде айтса, Кӧксуу-Оозы аймакта «Абайский» СПК-ныҥ аҥ ӧскӱреечилериниҥ бригадири Николай Асасыровко «Россияныҥ jурт ээлеминиҥ нерелӱ ишчизи» деген кӱндӱлӱ ат, Оҥдой аймактыҥ фермери Олег Ченчулаевке «Алтай Республиканыҥ jурт ээлеминиҥ нерелӱ ишчизи» деп кӱндӱлӱ ат адалган. АР-диҥ Кӱндӱлӱ грамоталарыла Улаган аймактыҥ мал-аштыҥ ооруларыла тартыжары аайынча станциязыныҥ jааны Р. Айткажанова, Кӧксуу-Оозы аймакта «Катанду» деп ээлемниҥ тракторизи С. Борошев, Шабалин аймакта «Барагаш» СПК-ныҥ механизаторы Н. Таркрашев кайралдаткан.
Jуунныҥ учында оныҥ туружаачыларына jакшынак ойын-концерт кӧргӱзилди.

cholmon011

А. СУЛУКОВ

Related posts

комментарии