Пятница, 29 марта 2024   Подписка на обновления  RSS  Письмо редактору
Базыл, кийис—кичинеги де, jааны да…
5:42, 20 ноября 2014

Базыл, кийис—кичинеги де, jааны да…


Оҥдой, Улаган, Кош-Агаш, Кӧксуу-Оозы ла Кан-Оозы аймактардыҥ jурттарында jаткан ла jӱрӱмниҥ уур-кӱч айалгаларына кирген балдарды кийисле иштеерине ӱредер ӱредӱлерди «Алтай кийис» деген коммерциялык эмес биригӱниҥ турчылары Айсура Таханова ла Айсула Такина ӧткӱрген.
Бу иш Алтай Республиканыҥ иш ле jонjӱрӱмдик министерствозыныҥ «Jалакай кийис» деп адалган ӱлекери аайынча ӧткӧн. Jӧмӧӧчилердиҥ тоозында Jерлик ар-бӱткенниҥ телекейлик кӧмзӧзиниҥ Алтай-Сайандагы бӧлӱги болгон.
Кийис базарыла башка-башка jурттардаҥ 145 бала танышкан. Ойын кептӱ ӱредӱлер ӧйинде Айсура ла Айсула балдарга Алтайда jаткан калыктардыҥ jебрен ӧйлӧрдӧҥ бери ӱзӱктелбей чӧйилип келген ижи, jадын-jӱрӱмиле, jаҥжыгуларыла ол кандый колбулу болгоны керегинде куучындаган. Ар-бӱткенди, jоголордыҥ чочыдузында болгон ӧзӱмдерди ле тындуларды корыыры керегинде jилбилӱ куучындар база ӧткӧн. Бу куучын-эрмектиҥ jаҥылгазы балдардыҥ баскан ла чӱмдеген кебистеринде чыккан.
Ӱредӱ ӧткӧн кажы ла балага кийисти базарына керектӱ эдимдер ле jӱзӱн ӧҥдӱ учуктар сыйлалган. Олордыҥ болужыла кӱӱнзеген кижи jараш ойынчыкты бойы эдип алар аргалу эмезе кебиске кандый бир jурукты чӱмдеп салар.
Бу ӱредӱлерде турушкан балдардыҥ эҥ артык иштери кийнинде кӧрӱлерге де чыгары темдектелет. Jе алган билгирлер—недеҥ де баалу сый, jӱрӱмде олор качан да артык болбос.

altcholmon-002

Светлана Кыдыева
Фотоjуруктарда: кийис базарына ӱренедис

Об авторе: Звезда Алтая


Добавить комментарий

© 2024 Звезда Алтая
Дизайн и поддержка: GoodwinPress.ru