Jуучылдардыҥ самаралары

Миноборонаныҥ запаста полковниги Андрей Альбертович Мундусов редакцияга таадазы Меркурий Каласович Кергиловтыҥ фронттоҥ бичиген самараларын экелген. М. К. Кергилов jарлу педагог Татьяна Меркурьевна Кергилованыҥ адазы. Меркурий Каласович Томсктогы университеттиҥ физико-математический бӧлӱгин, геолого-разведывательский университетти божоткон. Школдо иштеп турала, 1942 jылдыҥ jайында фронтко барган, 1943 jылдыҥ чаган айыныҥ 6-чы кӱнинде Ленингардский областьта темир jолдыҥ Грузино станциязыныҥ jанында ”Черное озеро“ деп разведоперацияда база 10 jуучылла кожо туружып, сурузы jок jылыйгандар.
Андрей Альбертович таадазыныҥ салымын jартаарга, канча jылдарга он jуучылдыҥ jуудаҥ озо jуртаган jерлеринде военкоматтарла бичижип, архивтерге баштанып, кемниҥ де сурузын таппаган…

altcholmon-005

”Письмо от 30/VI-42 г.
Дьякшылыкту кюнюмле бичип турум Нина сее эдьеме! Дье дьякшы дьядыгарба, Тордойдоҥ Токшыннаҥ письмо барба, олор кайда туру? Онойдо улус дьякшыба?
Онгудайда Таняны экелдербе? Экелген болзор, кюскюде ойто абарып салар. Орус школго юренип алзын. Тутушла оруп туратан бала болгон, дьякшы дьюрюбе орубай.
Мен Бийскийде воинский частьта турум, утабас фронтко аттанар болорыбыс. Курсак дьякшы. Юредю кюч болуп дьат. Нениҥ учун дезе капчай фронтко ийерге тюн-тюш юредип дьат. Нина мен 200 дьюс акча сее кёчюрип дьатым сен Татьянага пима тап бер канайып канайып. Мениҥ пима эдерге алган тюгюмди 5 кг Ёлётюге (ӧлӧтӱге-ред.) кижи уртай берген, айлым отоло.
Таняны дьаман кёрбёй алып дьюр. Ёлбёй эзен дьянсам ундыбасым. Мен канай, канайип угулбай барсам, собеске бичик берер, Таняга акча тёлёсин деп. Дье дьякшы болзын Нина, эдьеме, Сыгырга.
Ойто капчай бичи. Мен аттана берерим“.
(Кергилов деп кол салган-ред.)

(Бу самараны М. К. Кергилов кайда да сыгын айда бичиген, Шабалинде почтаныҥ алган ӧйи—15.09 деп таҥма бар)
Здравствуйте Нина, Таня, Вася и сестра Таман!
Шлю горячий боевой привет! Ну как живете и каково ваше здоровье? Как идет сено-хлебоуборка? Пишут ли письмо Николай и Тордой. Шлите адрес их. Татьяну учите в Каспе. Я жив и здоров как бык. У нас на фронте ничего особенного нет. Пули летят градом над головой.
Мой адрес:
Полевая постовая станция 951 3-ий стрелковый полк 3-ий стрелк. батальон 9-ая рота 2 взвод“.
(Кергилов деп кол салган-ред.)

“14/XI-42
Дьякшы дьякшыларба эдье. Не солун собр неме бар слердиҥ дьерде. Мен балуладала, госпитальга дьатала, ойто дьякшы болуп чыктым. Ай ажыра дьятым госпитальга. Ойто фронтто келген турум. Слердеҥ мен бирде письмо албатым. Письмоны орустап бичигер, дьарт эдип. Кёп неме бичибегер.
Таня ла Вася дьякшы дьюрюбе оны бичигер. Онгудайдаҥ письмо алып турум. Николай ла Тордойдоҥ письмо бар болсо адресин ийе берер мее.
Письмо бичигер мее. Мен сакып турум.
Мениҥ адресим бу: 951 полевая почта часть 358
Дьякшы болзын“.

Редакциядаҥ: Нинаныҥ алтай ады Торкочы. Ол Паслей Самыктыҥ энези, Меркурийдиҥ Таман эjезиниҥ кызы. Тордой—Паслей Самыктыҥ адазы. Николай Тодошев—Меркурийдиҥ Таман эjезиниҥ уулы.
Нина Бельчекова белетеген.

Related posts

комментарии