Четверг, 28 марта 2024   Подписка на обновления  RSS  Письмо редактору
Jуучылдардыҥ самаралары 2
9:47, 24 ноября 2014

Jуучылдардыҥ самаралары 2


Ада-Тӧрӧл учун Улу jууда турушкан кажы ла jуучыл jерлежис биске—jалтанбас баатыр, кайра базарын билбес черӱчил ле коручыл. Кем де ундылбаган, не де ундылбас деп тегиндӱ айдылбаган. Адалар канзыраган ӧштӱни jеҥип, Тӧрӧлисти фашист jутпаныҥ олjозынаҥ айрыгандар. Jуу-чактыҥ корон-шыразы качан да ундылбас. Эзем баладаҥ балага, ӱйедеҥ ӱйеге, уктаҥ укка улалар. Ака-карындаштардыҥ ла эjе-сыйындардыҥ ады-jолдоры ӱргӱлjиге артар.
Албаты-jон келер jылда дезе Улу Jеҥӱниҥ 70 jылдыгын темдектеерге белетенет. Ороонныҥ тӱӱкизинде ол эҥ jаан ла jаркынду байрамдардыҥ бирӱзи болуп артарында кандый да алаҥзыштар jок. Юбилейлӱ jылга темдектелген керектер база кӧп. Алтай Республикада Ада-Тӧрӧл учун Улу jууга учурлалган кереес-мӧҥкӱлерди чыныктап jазаар иштер башталды. «Jууныҥ балдары» деген кыймыгу элбеп кӧндӱкти. Ветерандарды jадар jерле jеткилдеери база jаан аjаруда.
«Алтайдыҥ Чолмоны» газет мӧҥкӱлик эзем деген тизимди улалтып, оны мынаҥ ары Улу Jеҥӱниҥ 70 jылдыгына учурлаарга туру. Айдарда, jуучылдардыҥ самараларын jууп, олорды газеттиҥ бӱктеринде кепке базар иш башталып jат. Кычыраачылар бу баштаҥкайды эрчимдӱ jӧмӧӧр деп иженип турубыс.
Бала-баркада, тӧрӧӧн-туугандарда, кӧрӱш-таныштарда фронттоҥ келген самаралар арткан ла болбой. Jурт jеезелердиҥ jаандарына, архив аайынча бӧлӱктердиҥ, музейлердиҥ, библиотекалардыҥ ишчилерине, школдордыҥ ӱредӱчилерине, ӱренчиктерге, тӧрӧлчи кӱӱндӱ бастыра jерлештерге бу керекте турушсын деп баштанадыс. ӧмӧлӱ иш качан да ӧчпӧс. Чеберлеп ле кичееп jӱрген ӱч толыкту jуучыл самаралар биске кӧпти айдар аргалу.
Самараларды редакцияныҥ суруузына ийигер. Газеттиҥ электрон почтазын тузаланарга база jараар. Колбуны самаралар алыжар бӧлӱкле тудар арга бар. Телефоны: 2-50-49. Журналисттерде Улу Jеҥӱниҥ 70 jылдыгына учурлай «Jуучылдардыҥ самаралары» деген бичик кепке базып чыгарар амаду бар. Бу jаан иш бӱтсе, jерлеш jуучылдардыҥ ады-jолдорын мӧҥкӱлеер керекте база бир учурлу иш эдилер эди.

pisma

Редкӱрее

Об авторе: Звезда Алтая


Добавить комментарий

© 2024 Звезда Алтая
Дизайн и поддержка: GoodwinPress.ru