Пятница, 29 марта 2024   Подписка на обновления  RSS  Письмо редактору
Кызычактарына курчаткан
10:54, 29 ноября 2014

Кызычактарына курчаткан


cholmony0023

«Алты балалу болор амадуум jӱрӱмде бӱдерге jат»—деп, эмди jиит эне, 33 jашту Снежана БОЛТОКОВА айдат. Jитас сӧӧктӱ бу келин Кош-Агаш аймактыҥ Кызыл-Таш jуртында чыккан. Ол тӧрт кызычактыҥ кару энези. Балдардыҥ аттары да солун. Урмила (ада-энези тапкан ат, кийнинде кӧрӧр болзо, индийский тазылдарлу) 3-чи класстыҥ ӱренчиги. Виолетта (телевизордоҥ уккан ат) 5 jашту. Снежананыҥ энези баркаларымды алтай атла адаарым деп айдып, кийнинде чыккан Байлананы ла Бай-Санааны бойы адаган. Байлана ӱч jашту болзо, Бай-Санаа jӱк ле бир jашту. Эзенде jаскыда Болтоковтордыҥ билезине база бир баш кожулар. Снежана бежинчи кыс сакыйт.
Jиит эне тӧрӧл jериниҥ школын, кийнинде калада 28-чи таҥмалу профучилищени «штукатур-маляр» деп специальность аайынча божоткон. Бир jыл Ийин jурттыҥ СПТУ-зында кӧкчиге ӱренген. Эмди ол кӧктӧнип те билер, бисердеҥ jӱзӱн-jӱӱр эдимдер эдип, айылын кееркедет. Туразы да сӱрекей эптӱ ле jакшы jазалган. Кӧрӧр болзо, Снежананыҥ эш-нӧкӧри Руслан узанып турган кижи. Ол агаштаҥ столдор, шкатулкалар, кайырчактар, оноҥ до ӧскӧзин эдет. Кӧп балдарлу эне айылында тегин отурбай, балдардыҥ садына, школго jакылтага jуруктар jурайт, кемниҥ де ордына таскадаачы, каруулчык болуп иштейт.
Кӧп балдарлу келин бойы да jаан биледе чыдап ӧскӧн. Оныҥ энези Маҥыр Jоруковна Ельдепова ус колду кижи, алтай тойдыҥ кеп-кийимин кӧктӧйт. Сыйны Марина Кызыл-Таш jурттыҥ школында jуранарыныҥ кружогын ӧткӱрет. База бир сыйны Аржана Акjол jуртта ӱредӱчи болуп иштейт. Карындажы Сарымай Чечен jеринде контрактла черӱчил молjузын бӱдӱрет.
Кӱчӱрген айдыҥ 30-чы кӱнинде орооныста Энениҥ кӱни темдектелер. Айдарда, бис Снежананы бу байрамла уткып, бойына ла балдарына су-кадык, ырыс кӱӱнзейдис. Эмди Снежананыҥ амадузы—уулду болоры. Алтынчы балазы уул болор бо? Оны ӧй кӧргӱскей.

А. ТОРБОКОВА

Об авторе: Звезда Алтая


Добавить комментарий

© 2024 Звезда Алтая
Дизайн и поддержка: GoodwinPress.ru